Bibliothèque Nationale, collection Lorraine, t 119, n°138.
1423, 7 octobre, Maxey-sur-Meuse. Dommoget Truillart, maire de Domremy, Jacques d’Arc, doyen, demeurant au dit lieu de Domremy, Jean Rainnessons, maire de Greux, Jean Colin, demeurant au dit lieu de Greux, et dix autres habitants notables de Domremy et de Greux reconnaissent au nom de tous les habitants de ces deux villages que chaque feu entier y doit 2 gros et la veuve 1 gros, pour droit de protection et de sauvegarde, à Robert de Saarbruck, seigneur de Commercy, lequel droit est payable au château de Commercy.
Nous, officiaulz de la court de Toul, faisons savoir et cognissant à tous ceulx qui ces presentes lettres verront et orront que ad ce et pour ce en leurs propre personnes estaiblirent en la presence de nostre amey et fiable Richard Oudinot de Marcey soubz Brixey, clerc notaire jurey de nostre dicte court de Toul, pourtant nostre povoir en ceste partie, auquel nous avons adjoutey ancoiz et adjouter voulons foy et creance planiere es choses cy après escriptes et en plux grant ; pour ce personellement estaiblirent Dommoget Truillart, de Dompremi, maieur au dit leuc Aubrit Jannet, eschevin, Jaqes d’Arc, doyen, Demoges Muniers, Perrel le Muniers, Colart le Questain de Mundrevalz, demorant au dit Dompremi, Perrin le Drappier, tuit demorant au dit Dompremi ; Johan Rainnessons, maieur en la ville de Grex, Jehan Porret, eschevin, Walterin le Doyen, Jehan Guillemette, Jaquemin de Roize, Jehan Collin, Jehan Morel tuit demorant en la dicte Grex, ensemble tous lez habitans, manans et demorans es dictez villez de Grex et Dompremi, laquelle l'une despent de l’autre. Iceulx convoquez et appellez par nons et sournons ensemble par cummunaltey et pour et en nons de communaltey et chascuns d'eulx, c’est assavoir lez dessus nommez eulx tous ensembles pourtant et faisant fort de tous les dis habitans des dictez villes de Dompremi et de Grex, pour et en nons des dictez communalteys, et chascuns d'eulx pour le tout, ont congnu et confessey de leurs plain grey et bonne voluntey, sans force, sans contrainte ou seducion quelconque, maix de leurs pure, meheure deliberacion et certainne science ont recongnu et confessey et par la teneur de cez presentes congnoissent que, pour eulx et leurs ayans cause, presens et fetur, sont tenus et efficacement obligiez de paier et rendre chascun an une foix, au jour de feste Saint Martin d'ivers, leurs gardez nommeement à Robert de Sarrebruche, seigneur de Commarci et de Venesy, conte de Roucy et de Brainne et signours du Pontarcy, c’est assavoir que chascuns mainnaige faisant feu et fumere pairat, renderat et deliverrat au dit Robert, signour de Commarcy dessus dit ... pour chascun feu entier deux gros bonne monnoie coursable, et la vesve femme ung gros telle monnoie. Lesquellez gardez et proteccions dessus dictez les dessus dis habitans, manans et demorans, quelques qu’ilz soient demorans es dictez villes de Dompremi et Grex, presens et advenir, pairont et renderont la dicte proteccion et sauvegarde au dessus dit Robert, signour du dit Commarcy, ens et ou chastel du dit Commarcy, et est la vie durant du dit Robert, signour du dit Commarcy. Et ont promis et promettent les dessus dis maieurs, eschevins et doyens dez dictez villez, et chascuns d'eulx pour le tout, ensemble la communaltey d'icellez evoquée et assemblée par foy et loy de communaltey, par la fois et serment ... donnée corporellement en la main du dit notaire jurey en leuc de serment, de tenir et avoir qu’ilz tous ensemble tanront et aueront ceste dicte proteccion et garde, la vie du dit Robert dessus dit, ferme [et estable à tousjours] et pourteront bonne et leaulz garentie et franche deffence au dit Robert, signor dessus dit, contre et envers tous ceulx qui ad jour de droit vouldront venir, sans aler, faire ou souffrir aler dire ou opposer contre ... comment que ce soit, surs l’obligacion ypothetique et especiaulz de tous leurs biens moblez et non moblez presens et advenir, partout où ilz soient et pourront estre trouvez. Et ont renunciez et renuncent lez ... dessus, par leurs dictez fois, surs les choses dessus dictez, à l’ignorance de fait et de droit, aux exception de la dicte proteccion et garde ... ainsic faicte, de fraude, de barat, de malice, de lesion, de ... oultre la moitié du droit pris et au benefice de restitucion. Et ont renuncié les dictez femmez vesvez au benefice de Valeyen, à l'eutentique " Si qua mulier " et à tous autres benefices introduicts ens favourx ... ont renuncié à toutes et singulieres excepcions, decepcions, allegacions, deffencez et raisons, tant de droit escript comme non escript, meismement au droit general renunciacion niant valloir, si li especiaul ne precede ... eulx, leur hoirs, tous leur biens dessudit en la juridicion de nostre dicte court de Toul et de toutes aultres cours ecclesiastiques et seculeirez comme chose congnue et adjugie. en tesmoingnage de veritey et ... fermez et estaiblez, nous officiaulz dessus diz, à la supplicacion des diz habitans, par la fiable relacion de nostre dessus dit notaire jurey à nous faicte, avons nous fait mettre le seel de nostre dict court de Toul en cez presentes lettrez, en l'an de grace Nostre Signour mil quatre cent et vingt troix, le VIIème jour du moix d'octembre presens discrette personne messire Guillaume Frontey, du Nefchastel, Thiesselin le Loup, de Marcey, et Pierre de Couverpuix, tesmoings ad ce appellez.
J. de Marcey, Ita est concessum coram me notario et testibus predictis.
Aucun commentaire:
Enregistrer un commentaire