Minutes de Collin, notaire, minutier de Me Gitton, notaire à Orléans.
Le lundi, huitième jour d'avril, avant Pasques, l'an mil iiije lxxv, noble homme Jehan du Lys, escuier, seigneur de Villiers-Charbonneau, promect à Jehan Biémont, sergent de monseigneur le duc d'Orléans, commissaire ordonné par monseigneur le gouverneur du duchié d'Orléans ou son lieutenant, à prandre et lever, soubz la main de mondit seigneur le duc, la pesche d'un estang assis en la paroisse Saint-Aulbin en Souloigne, appellé le Coigné, tenu en fief dudit escuier, à cause de son dit lieu de Villiers-Charbonneau, et pesché soubz la main de mondit seigneur le duc, par icellui du Lys, par deffaut de homme ; - de le garentir, desdommaigier et deffendre de tous coustx et interestz que le dit sergent pourroit avoir, à l'occasion de ce que icellui, icellui sergent a baillé et délivré audit escuier XIIc de carpe, qui a esté vendu à Jehan Girart, au pris de xiij sols parisis le cent ; deux cens de carpeau de demy pié ou environ, qui a esté vendu à Guillaume Garsonnet ; et six quarterons de béchetons de demy pié ou environ, qui ont esté pris par le receveur du dedemaine, et mis ès estangs de Chasteauneuf, lesquelz ledit receveur a promis paier, à l'estimacion qu'ilz seront prisez. Et ou cas que ledit sergent est appréhendé de rendre et restituer à mondit seigneur le Duc ou autre, ladite pesche ; de là lui paier et bailler toutefoiz que requis en sera, obligeant comme pour les propres debtes de monseigneur de Duc, en rabattant par ledit du Lys les mises et depens faiz à l'occasion de la pesche dudit estang.
Aucun commentaire:
Enregistrer un commentaire