Don fait par Jehan du Lys à son cousin Jehan des Monts, 1496

Ledit jour 31 octobre (1496)

 

Noble homme Jehan du Liz, seigneur de Baignaulx, situé en la parroisse de Sendillon, ou diocèse d’Orléans, confessa de sa libéralle voulenté avoir donné, ceddé, quicté, transporté et délessé par don pur, solempnel et irrévoccable, fait entre vifs sans espérance ne entencion de jamès le révoquer ne rappeller, à Jehan des Monts le jeune, son cousin, fils de feu Colas des Monts, ou vivant de luy escuier, et de feu Agnès, jadis sa femme, à ce présent, icelui Jehan estant aagé de dix-neuf à vingt ans, lequel, en la présence de Vyart et Jehan des Monts, ses frères, et de Loys Manceau, son serrurge, a pris et accepté pour luy, ses hoirs et aians cause, ung arpent de vigne à prendre ès vignes que le dit donneur disoit avoir de par conquest, assis au cloux de Savigny en ladicte paroisse de Sandillon, chargé des cens qu’il peut chacun an devoir envers qui il appartient ; retenu et réserve toutes voyes par icelui donneur l’usuffruit et joissance dudit arpent de vigne, sa vie durant, et sans ce que ledit usuffruit ores, ne pour le temps avenir puisse nuyre ne préjudicier à ce présent don. Et s’il advient que ledit Jehan des Monts aille de vie à trespas sans hoir de son corps, avant le dit donneur, en ce cas icelui donneur vieult que ledit arpent de vigne viengne viengne, soit et appartiengne aux dessus dis frères et soeur dudit Jehan des Monts, à leurs hoirs et aians cause. Ces présens don, transport et délés faiz pour la bonne amour qu’il disoit avoir audit Jehan des Monts et sesdiz frères et soeur, et pour récompenser icelui Jehan de plusieurs plaisirs, services et courtoisies qui lui a fais en sa personne et mesnaige, oultre les deniers qu’il peut avoir gaignez, méritez et deserviz au service dudit donneur, et pour ce que tels sont les plaisirs et vouloir d’icelui donneur. Lequel s’est dudit héritaige, soubz les réservacions, moyens et condicions dessus dis, dessaisi et saisit etc. En transportant, etc. En reconstituant et promectant ledit donneur non venir contre, etc., obligeant, etc., renonçant, etc.